IKAMBA RY'AMARIRA S01 Ep 18

Duheruka Karangwa Ari mu buvumo yisanze mo yari mu cyumba cye. Ubwo buvumo birimo iki?
.
Inkuru ya Navio kki dabble le, mbahaye ikaze.
.
Karangwa yarushijeho kumva inyota yo kumenya ibiri imbere, afata itara rinini, araricana yinkira mu buvumo bwari bwarafunzwe imyaka myinshi. Yamanukaga buhoro buhoro, igitabo yasomaga  mu ntoki, kandi umutima we wuzuye amatsiko n’ubwoba bwinshi.

Igihe yari amaze kugera mu  buvumo, yasanze ari ahantu hakomeye kandi hashobora kuba hafite amabanga y’ubwami y’ibisekuru byashize. Inzu y'ubuvumo yari ifite urukuta rwanditseho ibimenyetso atari asanzwe abona, kandi hariho ibishushanyo bigaragaza ingabo, abami n’intambara. Karangwa yahise abona ko aho hantu hashobora kuba ari ububiko bw’amabanga y’ubwami bwa Panama, aho abami bose bahishaga ibanga rikomeye ryo gukomeza gutsinda intambara no gucunga neza ubwami, nkuko yatangiye kubyibwira.

Yakomeje imbere, areba ku rukuta rwari rwanditse ho amagambo mu Kinyarwanda cy'umwimerere, yasomye ijambo rimwe ryatumye atangara: **"Umugambi wo kwigarurira Mirindi."** Yatangiye kwiyumvamo ko hari byinshi byihishe inyuma y’iyi mirwano yose yarimo, ko ibibazo by’ibwami bishobora kuba byari byarateguwe kuva cyera. gusa nanone yumva harimo amayobera kuko ahubwo Mirindi Ariyo ishaka kwigarurira Panama, bitandukanye nibyo yarasomye. yongeye kubinyuza mo amaso Ati:" Umugambi wo kwigarurira Mirindi." byaramutangaje cyane, agira amatsiko menshi.

Akomeza kugenda, kugeza aho yasanze inkingi nini,  yari yanditse ho izina rya buri mwami wagiye agira uruhare mu kubaka ubwami bwa Panama. Ahagana hasi yabonye izina rya se, Rugira, ryanditse ku rukuta ruri hafi y’umuryango munini. Yibutse amagambo se yamubwiye kera akiri umwana ati: **"Hari byinshi utaramenya ku bwami, uzabimenya igihe nikigera."** Ni bwo yamenye ko iki ari cyo gihe yari yarategereje.

Karangwa yahumetse cyane, agerageza kwiyumvamo ko yiteguye kumenya ayo mabanga. Akigera ku muryango ukomeye, yashatse uko awufungura maze yinjira mu cyumba cyarimo ibintu bitangaje: hari intebe nini z’ubwami, ishusho y’umwami wa Panama, ndetse n’ikiganza kinini cyamurindaga. Mu kibumbano cyari imbere ye, cyari cyanditseho amagambo agaragaza uburyo bwa gihanga bwo gutsinda intambara no kumenya imitego y'abanzi. Amagambo ya nyuma Karangwa yasomye yamuhaye igisubizo ku bibazo byari bimubangamiye, ati: **"Kugira ngo wunguke, ugomba kumenya uwo ugomba kugirira icyizere, hanyuma ukamushora mo."**

Ari aho, Karangwa yahise abona ko ibibazo by’ubwami bwe byari bifitanye isano n'abantu bari hafi ye. Yibajije ku buryo Ingabire yamugendaga inyuma, ndetse n'uburyo Mutesi yabuze, maze amenya ko hari amabanga menshi ataramenya ku muryango we n'abantu bari bakimuzengurutse.

Mu gihe Karangwa yari arimo gusohoka muri cya kivumo, yatekereje ku rugamba ruri imbere, ku ngabo za Mirindi, ndetse no ku buryo agomba guhangana n’ibibazo byamugarije nk’umwami. Ariko kandi yari afite ikizere ko ibyigisho yakuye mu byanditswe mu buvumo byamufasha kumenya uburyo bwo gutsinda abanzi be no kugarura amahoro mu bwami bwa Panama.
arimo asohoka, yakandagiye igitabo, maze arunama aragitora, cyari cyanduye cyane, cyuzuye ho ivumbi ryinshi. yaragihanaguye, maze gusoma kugitabo, yikanga mo. igitabo cyari cyanditseho ngo, "Umwami utazwi waringanyijwe ingoma,"  yahise agira amatsiko aragifata arasohoka.
.
.
Muri icyo gicuku cy'ijoro, mu gihe ubwami bwa Panama bwari buzengurutswe n'ukwijima n'umutuzo utajegajega, umugabo wipfutse hose yinjiriye mu nzira yihishe yinjira mu nyubako Ingabire yari afungiyemo by’agateganyo. Yinjiraga yitonze, yirinda ko hari umusirikare cyangwa umukozi w’umwami wamwitegereza cyangwa ngo bahure.

Yageze mu cyumba Ingabire yari afungiyemo, akomanga gacya kugira ngo atamukanga. Ingabire yarahagurutse, akoza intoki ku rugi, amubaza mu ijwi ricisha make ati, "Ni wowe se?"

Umugabo yahise yikuraho umwitero yari yambaye mu maso, maze amwereka ko ari we, maze aramubwira ati, "Ni jyewe, nta mpungenge ugomba kugira."

Ingabire yahumetse asubiza umutima mu gitereko, maze amusubiza ati, "Ndabizi ko nta kintu nabasha gukora uko bikwiye mu buryo bwo gutera ubwami bw’umwami Karangwa, ariko ubu ngiye kubabazwa bingana iki?" Yarindiriye gato, maze abona wa mugabo arebye impande zose, atangira kumubwira imagambo akomeye.

"Ingabire," wa mugabo yahise amubwira mu ijwi ryuzuye ikinyabupfura n’akanyamuneza gake, "ubu ngiye gukoresha musaza wawe kugira ngo dushyire mu bikorwa umugambi wo kwigarurira Panama. Turacyafite amahirwe yo kugera ku byo twifuje kuva kera, kandi ntuzibagirwe ko nawe uri mu bantu bakomeye cyane mu gutuma dukomeza kujya imbere."

Ingabire yumvise amagambo ye maze agira ishema ryo kuba agifite uruhare mu mugambi w'ubugambanyi bwari bukomeje kwinjira mu bwami bwa Panama. Yaramwenyuye gato, maze asubiza ati, "Ese wumva musaza wanjye azashobora gucengera Karangwa uko bikwiye? Ayo mahirwe yo kwigarurira ubwami bwa Panama ashingiye ku ki?"

Wa mugabo yamuhaye icyizere, ati, "Musaza wawe ni umugabo wiyemeje kandi ufite igihagararo mu ngabo za Panama. Aramutse abonye urwitwazo cyangwa se aherekeje Karangwa mu rugamba ruri imbere, ashobora kubona uko amuhitana cyangwa se akamugambanira neza."

Ingabire yumvise iryo banga rishya, maze aramwenyura, yiyumvamo akanyamuneza. Yatekereje ku buryo, musaza we, uwo yizeraga kurusha undi wese, yashoboraga kugerageza kugera ku ntego yari afite yahishe mu mutima we kuva kera. Yahise amubaza ati, "Ariko Karangwa ni umwami w'ingabo zikomeye kandi zitojwe. Uzi ko biba bigoye kubona uko amwegera?"

Wa mugabo amusubiza, amwizeza ati, "Karangwa ashobora kuba afite ubwenge, ariko burya ubwenge si bwo bwonyine butuma utsinda urugamba. Hari byinshi tuzamenya mu gihe gitoya, kandi musaza wawe, uko twamwegera n’uburyo twamwigisha neza, azabasha guca mu nzira izamufasha kugera ku mwami bitamugoye."

Ingabire yahise agira icyizere gishya mu mutima, amenya ko urugamba rwatangiye mu buryo bushya, ariko atamenya ko ibyo byose ari ubugambanyi bwari bufitanye isano n’ibanga rikomeye yari yamenye ku ngoma ya Karangwa."

Mu gihe uwo mugabo yakomezaga kumusezeranya kugera ku ntsinzi, Ingabire yarushijeho kugira icyizere, atangira gucengera mu bitekerezo by'uburyo yazatunganya uwo mugambi neza, kugeza ubwo Karangwa azakurwa ku ntebe y’ubwami. Ibyo byose yabikoreraga kugera ku ntego ye yo kuba umwamikazi w’ikirenga, ndetse no kugera ku byifuzo yari yabwirwaga mu bitekerezo bye kuva mu bwana.
.
.
Mu gihe Karangwa yasohokaga muri bwa buvumo, umutima we wuzuyemo amatsiko no gutekereza cyane ku byo yari amaze kubona. Icyo gitabo yari agifite mu ntoki cyanditseho amagambo agira ati: "Umwami utazwi waringanyijwe ingoma," byamuteye kwibaza niba hari ibindi bintu bikomeye byabaye mu mateka y’ubwami bwa Panama ariko byagizwe ibanga. Karangwa yagize amatsiko yo kumenya uwo mwami utazwi, ni iki cyamubayeho, ndetse n'impamvu y'iryo zina ritazwi ryanditse muri icyo gitabo cyari cyarahishwe.

Mu cyumba cye bwite, yacanye itara afungura igitabo atangiye kugisoma. Muri iyo nkuru yari yanditswe, yaje gusanga ubutwari bw’abami bwari bwaranditswe mu buryo bwa gihanga, ariko hari inkuru imwe itangaje yavugaga ku mwami wigeze kwirukanwa ku ngoma kuko yari afatanyije n’abanzi b'igihugu mu mugambi wo kugambanira ubwami bwa Panama. Nyuma yo gusomamo yitonze, Karangwa yamenye ko uwo mwami yari yarafatanyije n’abanyamuryango b’ubwami bwa Mirindi mu buryo bujijisha, maze biza gutahurwa bitinze.

Karangwa yumvise ko aya mabanga ari ingirakamaro cyane ku rugamba rwari rugeze mu mahina. Ibyo yamenye byamuhaye ishusho y’uko hari impamvu y’uko Mirindi iteka ryose iba iharanira gufata Panama, kandi yibuka amagambo yanditse mu buvumo agira ati: “Kugira ngo wunguke, ugomba kumenya uwo ugomba kugirira icyizere, hanyuma ukamushora mo.” Yatekereje ko aya magambo yari amugenewe, kuko yari arimo gushakisha ukuri kuri Ingabire, ndetse no kwitondera abari mu bwami bwe.

Kuri uwo mugoroba, Karangwa yafashe umwanzuro wo kwiyegereza abagaba b’ingabo be bizerwa, cyane cyane Gasore, kugira ngo babashe gushyiraho gahunda yo gucunga neza ibwami. Yari yamaze kubona ko urugamba rutarimo guhera ku kibuga cy'intambara gusa, ahubwo rwanakomezaga mu mitwe y’abasanzwe bamugaragiye, kandi ko abanzi be bashobora kuba bari hafi.
.
.
kuruhande,
Uwo mugabo wipfutse, yitegereje Ingabire mu maso, aramwenyura gato maze arongera amugirira icyizere, ati:

“Ingabire, ndabizi ko ubufasha bwa Gasore ari ingenzi cyane mu mugambi wacu. Gasore afite ubushobozi bwihariye; ni we musirikare usumbije abandi mu bwenge no mu buhangange mu mirwano. Karangwa amwizera byimazeyo, ndetse amufata nk’uwamurinda muri byose. Ibyo ni ikintu gikomeye ku nyungu zacu, kuko bitazatugora cyane kumwiyegereza kugira ngo tuzamushore mu mugambi.”

Ingabire yaramwitegereje maze agira akantu ko gushidikanya ku maso, hanyuma aramusubiza ati:

"Ni byo koko, Gasore ni intwari idasanzwe, kandi ndabizi neza ko kuba Karangwa amufitiye icyizere bishobora kudufasha. Ariko rero ikibazo gikomeye mfite, ni uko Gasore atazi ko turi abavandimwe. Ntibyoroshye kumwumvisha ko turi umwe mu muryango. Ntabwo azigera abyemera cyangwa ngo anyumve, cyane ko ari umusirikare utemera imirimo y’ubugambanyi, kandi numvise kenshi avuga ko azaharanira ukuri."

Wa mugabo aramwenyura cyane 😁, asa n’uwari witeguye icyo kibazo. Yashyize intoki ku rutugu rwa Ingabire, amureba mu maso agira ngo amumare impungenge, maze aramubwira ati:

"Ndabizi ko Gasore atazi ko muri abavandimwe, kandi ni byo koko bishobora kumugora kubyakira. Ariko kandi, ntukeneye kumubwira byose ubu ngubu. Icya ngombwa ni uko tumufite mu ruhande rwacu, kandi uburyo bwo kubikora ni ukumwereka ko hari impamvu ikomeye agomba kubahiriza mu kurinda ubumwe bw’ubwami."

Yongeyeho, arushaho gushyira imbaraga mu magambo ye ati:

"Ikindi kandi, Ingabire, hari uburyo bushoboka bwo kumusunika mu mugambi, atarinze kubimenya byose. Wowe uzakomeza kumwereka ko ari ingenzi mu kubaka ubumwe n’umutekano wa Panama. Uko uzagenda umwegera umusobanurira impamvu z’amateka y’ubwami bwa Panama, azahita abona ko afite uruhare runini mu kwita ku bwami kurusha uko yatekerezaga."

Ingabire yatekereje ku buryo uwo mugabo avuga, agira icyizere gishya. Yiyumvamo ko, mu gihe abashije gukoresha ubushobozi bwa Gasore n’ubumuntu bwe, ashobora kumwiyegereza akamushora mu mugambi bateguye.

"Ndagushimiye ku bw'umugambi umpaye ishusho. Ndagiye nzatangira kwiyegereza Gasore buhoro buhoro, mwereke ko ibyo turimo ari ugutabara ubwami bw’abakurambere bacu," Ingabire amubwira, asa n’uwumva ko akomeje kubaka inzira igana ku ntego ye.

Uwo mugabo amusubiza, ati:

"Ni bwo buryo bwiza, Ingabire. Witonde mu migambi yawe, ariko kandi wibuke ko umwanya wacu ari muto. Karangwa aracyari mu mwanya ukomeye, kandi nubwo dufite Gasore, tugomba kwihutira gushyira mu bikorwa ibyo twateguye, kugira ngo dutange umusaruro mbere y'uko atangira kwibwira ko hari ikitagenda neza."

Ingabire yahumetse neza maze yibwira ko igihe cyo gushyira mu bikorwa umugambi wari ugeze. Ibitekerezo bye byari byinshi, ariko yamenye neza ko agiye gukoresha Gasore nk’intwaro yo kugera ku butegetsi kandi akabona ko igihe kigeze cyo kugira icyo akora kugira ngo yihutishe uwo mugambi wose.
.
.

Mu gitondo cya kare, Karangwa yahamagaje Gasore.

Karangwa yamubwiye ati: "Gasore, twamaze kubona ko hari ibintu byinshi bikomeye muri uru rugamba. Nyuma y’ibyo navumbuye mu buvumo bw’abami, namenye ko hari amabanga menshi akomeye ku bwami bwa Panama, kandi ibyo byose bitwereka ko tugomba kuba maso cyane. Ingabire ashobora kuba afite imishinga minini ariko atayitangaje. Ubu turasabwa gukorera hamwe kugira ngo turinde ubwami."

Gasore yaramwumviye, ariko nanone yakomeje kwibaza ku buryo Ingabire yashobora kugambanira ubwami,.
.
.
kuruhande
Ni mu gitondo kare muri Panama, ingabo za Karangwa zari zifite umutima wo gukomera ku rugamba, nubwo ubwinshi bw'abo bahanganye bwari bukanganye. Karangwa yari yategetse ko habaho gahunda yo kwiyegeranya no gukomeza imyitozo itajegajega. Yarafite icyizere ko Gasore, umugaba w’ingabo z’imena, azamuzanira amakuru akenewe ku irengero rya mushiki we Mutesi, kimwe n’ibimenyetso bishinja Ingabire mu bikorwa by’ubugambanyi byari byaratumye Mirindi itera.

Gasore yageze mu nkambi y'ingabo za Rugema mu majyepfo. Rugema yari amutegereje ahantu harinzwe n’igisirikare gikomeye, maze amubwira amagambo y’ibanga:

"Gasore, amakuru dufite yemeza ko Ingabire yagiye yohereza intasi mu birindiro byacu kugira ngo abamenyeshe ibivugirwa hano. Hari ibintu byambayeho kugira ngo mbone amakuru agomba kugera kuri Karangwa. Twamenye ko Ingabire afite uruhare mu migambi yo guhirika ingoma ya Karangwa.”

Gasore yumvise arushijeho kurakara, ariko ntiyashaka kugaragaza ko ibyo bitunguranye. Yamenye neza ko Ingabire atari umugore wo kwizerwa, ariko kumenya ko yishora muri ibyo bikorwa by’ubugambanyi byashenguraga umutima we. Yahise afata icyemezo cyo gutahura neza uko ibintu bihagaze, kandi yari afite gahunda yo kuburira Karangwa ngo abe maso.

Mu bwami bwa Ntega, aho Mutesi yari yashimuswe…

Mutesi yari agifite icyizere, n’ubwo yari yarafashwe nk’imbohe mu gace kari kure y’iwabo. kuri uwo munsi, igihe yari yicaye wenyine mu cyumba ke, umutima we wahoraga wibuka ibyiza yanyuranyemo na Gasore, mu gihe yari atarashimutwa. Ubwiza bw’urukundo rwabo ni rwo rwamuhaga imbaraga mu bihe bikomeye, kandi yari yiringiye ko umunsi umwe azongera kubonana n’umukunzi we.

Karugendo, umwami wa Ntega, ntiyashoboraga kwihanganira kubona Mutesi amwanga n’ubwo bari mu gihugu cye. Yinjiye mu cyumba ke, agaragara nk'uwitwaje impamvu yihariye. Ijwi rye ryari ryuzuye ububasha, ariko n’ubundi akagaragaza n’agashya k’umuntu wihagararaho.

"Mutesi," Karugendo yatangiye amureba mu maso, "wenda ntubyemera, ariko nkwiriye gutera intambwe, dushyire hamwe kuko amahirwe yawe yo kubaho ari hano i Ntega."

Mutesi amusubiza amureba nta bwoba, ijwi rye ririmo umwiyemezo: “Karugendo, icyo nzi cyo ni uko iby’agahato bitazigera bingarurira umutima. N’umunsi umwe nzataha muri Panama, kandi urukundo rwanjye ni urwa Gasore gusa.”

Karugendo yararakaye ariko agerageza kwisubiza agatima impembero. Yatekerezaga ku buryo Mutesi ashobora kumwihorera akemera kuba umugore we, ariko yari ataramenya neza uko azamufatisha neza mu mutego we.

Mu bwami bwa Panama…

Mu gihe Gasore yari amaze kumva neza gahunda ya Rugema, yihutiye guhaguruka ajya gusubiza amakuru ku mwami Karangwa. Bageze aho bakunze guhurira, Karangwa aramwihanganisha ku byamubayeho mu bihe byashize, ndetse aramushimira ku bwitange akomeza kugirira ubwami.

Gasore yamubwiye agira ati: “Nyagasani, Ingabire ashobora kuba ari we uri inyuma y’ibi bikorwa byose by’ubugambanyi byatumye Mirindi itera igihugu. Umuvumo urakomeye, kandi ni ngombwa ko tugira icyo dukora kugira ngo turinde ubwami bwa Panama.”

Karangwa yakomeje kumva Gasore amubwira uko yahuye na Rugema n'andi makuru yose y'ubugambanyi bwa Ingabire. Karangwa yumvise iby'ububasha bubi umugore we ashobora kuba ari gukoresha, maze icyo gihe, yifuza kumenya ukuri kw'irengero rya Mutesi n'ibyo Ingabire arimo gukora byose.

Ariko kandi, Karangwa yari afite umwanzuro wo kudashwana na Ingabire mu buryo bweruye. Yashakaga gukomeza gukorana na Gasore, ndetse yatekereje gusaba Kanyarengwe inama ku buryo azagenza ibintu, kugira ngo afate Ingabire atamwirata imbere cyangwa se ngo agirire nabi Mutesi, niba koko ari we ugomba kuryozwa ibyo bikorwa byose.
.
.
nyuma yo guhura na Gasore, izuba ryari rikirangirana, Karangwa yategetse abarinzi ko bamutegurira ibintu byose byo kurekura Ingabire. Yarigishije umutwe yibaza niba agomba koko kumuha andi mahirwe, ariko umutima we ugasanga hari ikintu cy'ikinyabupfura cyamubuzaga gukomeza kumufunga. Yari azi neza ko ashobora kuba yibeshya, ariko icyizere yari yariyumviyemo cyamutumaga ashaka kumuha amahirwe ya nyuma ngo yerekane ukuri kwe.

Mu gihe abarinzi bazanaga Ingabire, yagerageje kugenda yitonze, ariko umutima we ucyuzuye ubwoba n’amakenga. Yari atazi impamvu Karangwa yafashe iki cyemezo, kandi mu maso ye haragaragaraga ko hari ikimushishikaje bitandukanye na mbere.

Karangwa yarekeye imbere ye maze amubwira n'ijwi rituje, Ati:

"Ingabire, ndabizi ko hari byinshi ukeneye kumbwira. Nta cyo ntazi ku bintu bihishe inyuma y'ibi byose byabaye, kandi ndakeka ko uri umwanzuro wo gukomeza ubuyobozi bw'ubwami cyangwa se ikinyuranyo cyawo. Mfite icyo nkubwira: niba hari icyo wenda kumbwira, ubu ni wo mwanya wawe."

Ingabire yamurebye mu maso, agerageza gusoma muri we niba koko icyizere yamugiriye ari icy’ukuri cyangwa ari amayeri yo kumucengera. Nyamara ntiyashoboye kubyihanganira, maze atangira kwerekana ko yifitiye icyizere, ariko nanone ari umwanya wo kwitwararika.

"nyagasani, ndashima ko uhaye agaciro amagambo yanjye. Ibyo ndimo si ukuvogera ubwami bwa Panama, ahubwo ni ukubungabunga ubumwe bwacu. Ntabwo nari narigeze mbona ko ukeneye impinduka, ariko biragaragara ko igihe kigeze ngo ugere ku bikorwa bikomeye. Ni impamvu yatumye nshaka gufasha muri iyi nzira, kuko buri gihe narinziko ugomba kuba umwami uca mu bintu bikomeye kandi ariyo ntangiriro yo gukomera k’ubwami."

Karangwa yasetse gato ariko nta kintu kinini byavuze ku mutima we. Yari azi neza ko hari byinshi atari afite mu biganza bye, ariko ikintu yari akomeje gutekerezaho ari uburyo Ingabire yashakaga kugera ku mugambi we. Yaramwitegereje akomeza kumubaza:

"Ndaguha amahirwe yo kugaragaza impamvu ukwiye kuba uri mu ruhande rwanjye. Ariko unibuke ko impinduka zose zifite igisobanuro, kandi ibanga rikomeye mu butegetsi si uguhishira amabanga y’undi, ahubwo ni ukumenya icyo uri cyo."

Amaze kuvuga atyo, yategetse abarinzi ko bamurekura burundu, ariko kandi akomeza kumubwira n’ijwi ryo kwerekana ko yifuza ko amufasha gukemura ibibazo by’ubwami.

"Ingabire, sinkurenganyiriza ibyabaye, ariko nkushinze inshingano zo gukurikirana amahoro y’ubu bwami no gusuzuma neza iby'igihugu. Umenye ko twese dukorera kuzamura ubumwe bwacu."

Ingabire yaramwenyuye, yishimira amahirwe ahawe, ariko kandi afitanye n’ubwoba bw’ibiri imbere. Yari azi ko kugira ngo agere ku mugambi we, agomba gukomeza guca bugufi, ariko nanone yita ku buryo bwo gukora neza.
.
Karangwa nawe yageze hirya aseka mo..........................
.....................................
............................ loading episode...19
.
aha ninde ukennye undi? kuki Karangwa ahisemo kurekura Ingabire? yabase Afite undi mu pangu? Ingabire we aramanga iki nyuma yo kurekurwa? twamaze kumenya ko Ingabire na Gasore bavukana, Gasore we nabimenya biragenda gute? ntuzacikwe.
.
|::::::::::::::::::::::::::::::-navio-nv-:::::::::::::::::::::|