ELLA - Part 13

Uretse kudahuza amasaha byatumye aryama mu gihe  byabonekagako  ari amasaha ya kumanywa, ubundi rwose Ella yashakaga kwirebera umugi wa Las Vegas yitonze

Gusa mu  mutima we yarimo ashimira nyirasenge wamuhaye agatekerezo ko gutembera kuko byatumye arushaho kumenya ahantu hatandukanye, abantu n’imico binyuranye.

Ku rundi ruhande yishimiraga uburyo aba bana bamwise malayika ibintu byatumye se amusaba kugumana na  bo byibuze igihe runaka

Ubwo igihe cyo kujya ku meza cyageraga yasanze abandi ku meza muri  salon  nuko arya vuba kugirango byibuze abone  uko agaburira abana.

ELLA: ariko Laila urabona  koko ukuntu wahinduye ameza?

Lana ntiyihanganiye kutamwigana

LANA: urambonera koko?

ELLA: umva uyu  na we

Yabivugaga  amureba ikijisho ibintu byashekeje Lana  maze Ella ahanagura ku meza ibyokurya batayeho gusa  wabonaga atabarakariye ahubwo  byari ugukangara bya kibyeyi nubwo  we atari umubyeyi ariko burya bitangira ukiri muto nanone

Khalil yaje na we kubyuka maze abasanga muri salon

KHALIL: amakuru yanyu  abana?

Ella acyumva ijwi rya Khalil  yabaye nk’ufashwe ahari  n’amashanyarazi  kuko yahise yibaza ibiri bukurikireho

Khalil  na we yicaye ku meza

KHALIL: bite se Ella

ELLA: ni  byiza

Gusa  yavugaga atuje ndetse yubitse umutwe

LAILA: papa waraye neza se?

KHALIL: naraye neza mwana wa. namwe se ni neza?

Ella yigize nk’aho we  atari mu  bari kubazwa aricecekera arareka abana bakomeza kuganira na se

LAILA: jyewe naraye neza pa

LANA: nanjye ni neza papa

We  yabivugaga yifitiye amata ye arimo kunywa

KHALIL: hanyuma se wowe Ella? Waraye ute?

Ijwi rye  na ryo ntabwo yari ashaka kuryumva rwose rimuvuga kuko kuryumva ubwabyo bituma yumva avuye mu bintu akabura amahoro mu mutima mbese akumva birahindutse muri we nubwo rimwe na rimwe abihisha ariko ashenguka ashira agapfira muri nyagasani

ELLA: yego naraye  neza cyane, murakoze

Yamurebye  mu maso aramwenyura kuko yabonaga  indoro ya sheikh itoroshye  akibaza  niba ahubwo atari kubikora  ku bwende ngo amuteshe  umutwe amubuze amahoro

Ella yateruye  ikirahure cya juice  nuko atangira kunywa ariko abaza na Khalil

ELLA: uyu munsi se ndakora iki?

KHALIL: uyu munsi wisanzure ukore   icyo ushaka cyose

Ella yumvise icyo gisubizo kitamunyuze kuko  uyu nubwo atari shebuja byuzuye ariko nanone agomba kumuha gahunda y’umunsi na cyane ko ari we wamusabye ngo bazane, ni we uzi ibikenewe

ELLA: gukora icyo  nshaka sinumvise icyo  mushatse kuvuga ubwo ariko

KHALIL: nshaka kuvuga ko uyu munsi icyifuzo cyawe kiri bube itegeko. Wowe uhitemo icyo ushaka umbwire ubundi gikorwe  ako kanya

Abana  bahise  bo  bisekera kuko babonaga ibyo se na  Ella barimo bimeze nk’imikino ahari

ELLA: unyihaganire gukomeza kubaza ariko  ndakeka turi hano kubera gahunda zawe ntabwo ari izanjye. Ubwo rero ntubyite gusuzugura ariko  sinumva igituma  umbwira gutyo

Yavuze atyo maze mu maso ha Khalil harijima

KHALIL: ibyo uvuga koko ni  ukuri naje muri  gahunda z’akazi ariko uretse akazi nanone  ngomba kwita  ku bana banjye

ELLA: ndabbyumva  rwose nanjye  nabazaga gusa ntakindi

KHALIL: ubwo rero  guhitamo byakunaniye reka jyewe nihitiremo.  Tugiye kujya gutembera ngaho genda witegure nanjye ndasigara ntunganya abana

Ella yahagurutse yumva muri  we afite akajinya kuko uyu mugabo ari kumwereka iteka ko ari we ufite ijambo rya nyuma gusa nanone yumvaga koko ari byo kuko nyine  aramuruta  kandi anafite igitinyiro. Yageze mu cyumba atangira kwitunganya ariko uko yitunganyaga yibazaga cyane  kuri uru rugendo

Gusa uko yabonaga uyu mugi mwiza cyane, uko abana  na se bishimanye, byarushagaho gutuma na we yumva yishimye ndetse byatumye  afata amafoto atandukanye y’urwibutso azanereka nyirasenge kuko  ibi byose nubwo bitari biri muri gahunda   ntabwo byamuguye nabi

Gusa ikibazo nyamukuru yari afite niuguhuza amaso na Khalil kuko rwose guhuza amaso na  we byatumaga yumva atazi  uko abaye 

Yamwumvise  ari  guseka n’abana ahindukira ngo arebe ibyo barimo baseka maze aba  ahuje amaso na Khalil arongera yumva muri we birivanze nnanone  ariko arikomeza

Nyuma y’igitondo bamaze kumwe n’abana nibwo Ella yaje  kujya mu cyumba cye ngo yongere yitegure  ariko aza   gutungurwa  no  gusanga ku buriri bwe hari agapfunyika karambitseho maze ahita agira amatsiko yo kureba icyaba kirimo maze ubwo yafunguraga yasanze harimo ikanzu nziza cyane bidasanzwe

Yatekereje ahari yuko yaba afunguye impano itari iye wenda igenewe undi muntu ariko Khalil akaba yifuje kuyifasha mu  cyumba cyen nuko  arongera afunga neza  ka gapfunyika maze yerekeza mu cyumba cya Khalil

Yageze ku muryango mbere yo kwinjira yibuka uko  ubushize byamugendekeye maze abanza gukomanga noneho  ategereza guhabwa karibu

KHALIL: injira Ella

Wagirango yaramurebaga ariko se ko bari kumwe bonyine aho n’abana undi waba akomanze yaba ari nde ko imikomangire y’abana atari kimwe n’umuntu mukuru

Ella yarinjiye nuko asanga Khalil ahagaze arebera mu idirishya amuteye umugongo

ELLA: mumbabarire kuba wenda mbarogoye ariko aka gapfunyika ngasanze mu cyumba cyanjye ubanza mwibeshye kugashyira ahako

KHALIL: oya ntabwo ari ukwibeshya ibyo ni jye nabikoze rwose

Ella akigafashe mu ntoki yahise yibaza icyaba cyateye uyu mugabo kumugurira iyi kanzu

Noneho akanibaza igituma ari kumusubiza atanahindukiye ngo amurebe

Ubanza Khalil yaramenye ko ari kubyibaza nuko arahindukira noneho

KHALIL: nta kosa ryabayemo ni jyewe nakahashyize rwose

Ella yakomeje kwibaza impamvu

ELLA: none se kubera iki ari ho mwagashyize?

KHALIL: uyu mugoroba turi busohoke

Yabimubwiraga ari kumusatira yifashe mu mifuka

ELLA: erega uri kubivuga ukomeje nk’aho ari ibintu wabanje kumbwira mbere cyangwa twumvikanyeho cyangwa nemeye koko

KHALIL: ariko ndakeka ko nta muntu ujya yanga ubutumire rwose

ELLA: wenda ibyo byo ni byo ariko sinumva impamvu nyine gusohoka bihuye no kugura iyi kanzu. Noneho ushaka kumbwira ngo nidusohoka ni yo ndi bube nambaye?

Aho kumusubiza ahubwo yakomeje kuza amusatira ibintu byatumaga Ella yumva arushijeho kugira amasoni n’ubwoba ariko no kumva muri we adatekanye na gato rwose

KHALIL: sha iyo kanzu nkubwije ukuri yampenze rwose ungiriye neza wakemera ukaza kuba ari yo wambaye pee

Ella wari utegereje kumva Khalil amubwira nabi cyangwa amutegeka noneho yatunguwe no kubona abimubwiye ameze nk’uri kumwinginga ndetse atamuhatiriza. Yari atuje kandi ubona akomeje rwose mu byo avuga

ELLA: none se mwamfasha mukambwira aho turi busohokere?

KHALIL: ntabwo ari kure ni muri iyi nyubako turimo mu nzu yo hasi hari ibintu byiza cyane byatuma umugoroba utubera mwiza. Ahubwo ndagutegereje saa moya n’igice, duhurire muri salon tugende

Ella yarasohotse nuko ahagarara inyuma y’urugi nyuma yo kurukinga. Yagiye mu cyumba cye yumva ameze nk’aho atuzuye neza nuko arongera afungura ka gapfunyika akuramo ya kanzu. Ikanzu yari nziza cyane  bidasanzwe na we yumvaga atabura kuyambara  gusa muri we akomeza kwibaza ati Kuki?

*_Kuki se wa mugani? Aho ntiyaba agiye kubwirwa ijambo? Agace ka 14 ntuzagacikwe_*k