ELLA - Part 20

Aho ari mu  gikoni yambaye itabuliya yabugenewe, Ella yarimo ategura  gateau yo  kuza guha abana ariko yanashakaga kwereka Khalil ko ibyo yamubwiye   bitari amirariro  ahubwo guteka abizi  neza

Abana bamuhagaze iruhande  yabahereje spatula yakoreshaga ayisiga nuko  barayikomba maze  abona  Adia aje mu gikoni

ELLA: Adia  nkubaze  akantu?

ADIA: yego mbaza nta kibazo

ELLA: ijambo habibti risobanuye iki?

Adia yabanje kumureba mbere  yo kumusubiza

ADIA: rivuga  cherie  cyangwa se copine. Rikoreshwa umugabo aribwira umuntu  w’igitsinagore. Iyo uvuze habibi ubwo uba  uvuze muri rusange  cyangwa ubibwiye umuntu w’igitsinagabo

Ella  acyumva ubwo  busobanuro  umutima we  warushijeho gutera cyane  ariko yumva arishimye

ELLA: ese  mama. Sawa  noneho

LAILA: papa maze akunda kubitubwira

ELLA:  koko  se  arabibabwira?

LANA: nyine arabitubwira  buri munsi

Ella yumvise ahindutse ukundi,   kumenya uburemere  bwa rya jambo yari yabwiwe cyangwa se izina  yari  yiswe kuko yumvaga ko  Khalil atamubonamo  uwo kuryamana gusa ahubwo  uwo  akunda.

Yihanaguye  mu ntoki nuko abwira  abana  kujya kuryama  bakaza kurya gateau  babyutse nuko aba ayishyize muri frigo maze ajya  kureba  Khalil

Khalil aho ari uburakari bwari bwakomeje kumuzamuka kubera umurundo w’impapuro yarimo ashakamo urupapuro rw’ingenzi ariko yarubuze

Yicaye yegamye mu ntebe amaboko ku mutwe yumva ananiwe gushaka ikintu ntakibone kandi agikeneye  cyane

ELLA: Khalil?

Kumva iryo jwi byonyine rimuhamagara  byatumye Khalil yiyongeramo  akanyabugabo ubundi aratuza ngo Ella  adasanga atameze neza

ELLA: injira  ni karibu

Ella yinjiye buhoro nuko  Khalil amwitegereza ukuntu yambaye ndetse noneho bwa mbere yari  amubonye imisatsi ye ifunze shinyo

KHALIL: kuki wambaye utyo se?

ELLA: nari ndi gukorera abana gateau rero mbaye mbaryamishije mu gihe bategereje ko itungana

Khalil ibyo yabyakiriye neza cyane, amubonamo umugore buri mugabo wese yakifuza mu buzima bwe

KHALIL: ngaho nyegera

Ella yaramwegereye nuko undi amwicaza ku bibero bye

ELLA: ariko ushobora kuba uhuze  cyane?

KHALIL: sha niko bimeze. Ndi gushaka impapuro papa ashobora kuba yarasize muri aya madosiye  ariko ndi kuzibura neza neza

ELLA: ngufashe se kuzishaka?

Khalil yaramwenyuye

KHALIL:  sha byanditse mu cyarabu ntabwo wabasha kubimenya

Ella  yubitse umutwe nuko Khalil akoresheje  ikiganza amwubura umutwe nuko amureba mu maso  nanone gusa ni ibintu Ella byamuzongaga cyane bigatuma yumva abuze amahoro neza  neza

Yumvise urumeza rumuzamutse nanone kandi  rwose ibi bintu bimubuza  amahoro

ELLA: none se nyine ni iki mu kuri uri gushaka?

KHALIL: ni urupapuro rukomeye cyane  kandi  rufite agaciro kanini pee

Ella  yaramurebye yumva amugiriye impuhwe  kubera uko yabonaga yahangayitse 

ELLA: noneho  mbe  nkuretse ukomeze ushakishe

KHALIL: oya nakomeza gushakisha uri na hano nubwo nanone ntakubeshye kuba uri iruhande rwanjye ntari bubashe gutekereza neza

Ella yagumye iruhande rwe  ariko mu mutima we yibaza aho ahera  amubwira ikiri kumugenza

Khalil na weyakomeje gushakisha impapuro yitonze gusa mu mutima we yicuzaga icyatumye  ibyo bintu atabikora hakiri kare rwose kuko biri kumutesha umutwe

Kuva yashaka bimutunguye  yari yaragize  depression gusa yabashije kuyirwanya kubera inyungu z’igihugu ariko igihe kinini iyo yabaga ari wenyine yarongeraga akamererwa nabi, akumva arihebye. Ntabwo yari yarigeze  atekereza ko umubabaro  we ashobora kubona umuntu utuma awibagirwa mu gihe gito cyane, none kuva  yabona Ella yumva  yaratuje ibintu biri ku murongo mwiza rwose

Niyo mpamvu Khalil ubwo yibukaga amagambo se yamubwiye atarashiramo umwuka yahise ashakisha izo mpapuro kuko zaba   urufunguzo rw’ibimubereye inzitizi  byose mu buzima bwe

Gusa  impapuro zose yakomezaga gushaka byarangiye nta na rumwe abonyemo nuko arongera yikorera umutwe biramuyobera

Ella aho ari na we yakomezaga kwibaza ahantu ari buhere amubwira ikimuzanye mu biro bye ariko ageze aho aratobora aramubwira

Yari azanywe no kumubwira yuko ashaka gusubira iwabo. Urugendo rwe rwari ruteganyirijwe kumara ibyumweru bibiri gusa ariko dore ukwezi yari aguhiritse acyibereye kwa Khalil ndetse igihe cyose yabyukaga yumva ari busezere ariko akabura imbaraga zibikora

Ubu bwo yari yamaramaje noneho umwanzuro yawufashe maze abibwira Khalil

Uyu akibyumva yabaye nk’uguye mu kantu nuko amara hafi iminota icumi yose atavuga

KHALIL: wabaye ugumye hano gato koko Ella?

Ella yibazaga amaherezo akabona ntari kuyabona neza

ELLA: oya ndabona nkwiye gutaha

KHALIL: umva habibti, noneho si ukubigusaba ndabigutegetse

Kumutegeka? Bitari  ukumusaba amwinginga byibuze koko? Ubwo se ni ibiki ibyo atangiye kandi?

ELLA: oya pee. Urabizi neza hashize igihe unyinginga nkemera ariko rwose urabizi ko ntagomba kuguma hano mu nyungu zawe gusa pee. Umunsi umwe ejo uti uwundi gutyo gutyooo

KHALIL: ko ntazakwemerera se kugenda?

ELLA: oya nawe wikabya nanone da. Noneho se ngiye guhinduka imfungwa yawe mbimenye? Igihe cyose nshaka kugenda nagenda rwose

KHALIL: none se ko ibyumweru bibiri utagiye?  Ko nagusabye ngo ube uretse ugakomeza kubyemera?

Yabitekerejeho  koko asanga wamugani na we gutaha byaramunaniye ariko nanone akabona ko agomba gutaha kuko  akaryoshye ntabwo kaguma mu itama

ELLA: nibyo koko  sinatashye kuko natekerezaga ko cyaba ari igitekerezo cyiza, ariko maze kubona ko nibeshye

Nibyo koko yari abizi ko yakunze urudashoboka  rero agomba kujya kure yabyo rwose nibwo yumva  yazagira amahoro

KHALIL: none se wibagiwe Laila na Lana

ELLA: nanjye umunsi ku  wundi mbona ko bakomeza kunkunda nanjye ni uko ndetse ntiwumve ko gusezera binyoroheye ariko se amaherezo? Sinzataha?

Khalil yaramwegereye amureba mu maso nkuko akunda kubigenza igihe cyose ashaka kumubwira ijambo rikomeye

KHALIL: nyine abo bana na bo  ni indi mpamvu ituma waba uretse kugenda. Indi mpamvu  nashakaga kubanza kubona  urwo rupapuro  rwose

ELLA: uruhe rupapuro ariko?

Akiri kumubaza ataramusubiza nibwo  Lana yahise yinjira aho bari yibyiringira mu maso

LANA: papa ibisimba nanone?

Bararebanye bibaza umwana usigaye arota noneho na ku manywa birabayobera

Ella yahise atega amaboko nuko umwana araza  amugwa mu gituza

KHALIL: Ella arahari  ibisimba arabyirukana humura ntugire ubwoba

ELLA: ngaho reka njye kureba na Laila tujye mu cyumba cyanjye ari ho tuba turyamye

LANA: ariko na papa araza tube turi  kumwe

ELLA: yego nta kibazo na papa araza rwose

Yahise ahaguruka amuteruye nuko amujyana mu cyumba cye ajya no kureba Laila araza aramuryamisha maze abaryama iruhande

Khalil yaje kuza koko na we maze abareba uburyo baryamyemo yitsa umutima maze na we aryama inyuma ya Ella aramupfumbata

KHALIL: ngaho nawe  shaka uko wabona ibitotsi

ELLA: nubundi ni byo ndi kugerageza

*_Abana baramushaka, Khalil na we ni uko. Urupapuro se yabuze ni urwa rubanza ki? Agace ka 21 ntuzagacikwe_*