ELLA - Part 11

Ella yahagaze imbere y’umuryango w’icyumba cya Khalil yibaza niba yinjira cyangwa se abyihorera kuko ntabwo yumvaga yiteguye na gato

Mu mutima we yakomeje kwibwira ati ni ukwinjira ubundi ngasaba imbabazi, birahagije

Akiri aho yabonye umurinzi anyuzeho avuye mu cyumba cya Khalil maze na we ahita yumva ko ari cyo gihe

Yahise yinjira atanakomanze ariko akigera mu cyumba yahise yipfuka mu maso

Yasubiye inyuma yipfutse mu maso yumva agonze urugi nuko arukingura atarebye ariko ubwoba n’isoni byari byamwishe neza neza

Gusa mu mutima we yashimiraga Imana ko yamubonye ibitugu gusa atamubonye imbere kuko yageze mu cyumba asanga Khalil yambaye ubusa, gusa igice cyo hejuru ariko na byo byamuteye isoni n’ubwoba kuko ntabwo yumvaga ko byemewe kureba umugabo w’abandi atambaye

KHALIL: umva Ella ndabona nukomeza iyo nzira urimo biri burangire ahubwo tugiye kogana

ELLA: ntabwo ariko ibi bintu bishekeje nubwo numva ubigize urwenya rwose

Ubwo yabivugaga akomeza kugenda apfutse amaso atanazi neza aho ari kwerekeza

KHALIL: jyewe ndumva binshimishije ahubwo rwose pee. Kuko nutera indi ntambwe uraba winjiye muri douche kuko uri ku muryango ujyayo

ELLA: ngaho rero ambara

KHALIL: ariko ndambaye pee

Ella yumvaga uyu mugabo ashobora kuba amubeshya akaba ashaka kongera kumutera isoni n’ubwoba

ELLA: ntabwo umbeshya mbyizere?

KHALIL: byizere rwose sinakubeshya

Ella yahindukiye buhoro abanza gukuraho ikiganza kimwe buhoro abona koko yamaze kwambara ishati maze abona gukuraho ibiganza byombi ariruhutsa

ELLA: mumbabarire rwose nakabaye nabanje gukomanga

Yarahindukiye buhoro abona koko ari hafi neza neza ya douche nkuko Khalil yari yabimubwiye

Na byo byamuteye isoni uburyo yahungaga yerekeza muri douche aho kwerekeza ku muryango usohoka

Icyumba cya Khalil cyari kinini bidasanzwe ku buryo  washoboraga kukizenguruka  umwanya munini rwose 

KHALIL: nta kibazo ariko. Gusa sinabura kukubwira ko uri umuntu wa mbere winjiye muri iki cyumba udahamagawe. None se wari uje kumbwira iki?

ELLA: nari nje gusaba imbabazi kubera ibyabaye mu gitondo…

Gusa ntabwo byamubujije  kumwitegereza. Mbega umugabo mwiza wee. Yari yambaye imikara hose ariko rwose wabonaga aberewe kandi yabaye mwiza bidasanzwe

KHALIL: reka biriya bibaho nta kibazo rwose urababariwe. Ahubwo mbwira, ngo uzi kubyina?

ELLA: ngo iki?

KHALIL: abana bambwiye ko wababyiniye ngo uri kwirukana ibisimba mu cyumba

ELLA: eeeh. Biriya se ni ukubyina buriya koko? Nikaragaga bisanzwe imbere y’uburiri gusa ntabwo nabyita kubyina rwose.

KHALIL: gusa nabikunze ufite impano idasanzwe

ELLA: mu bihe bidasanzwe nyine uba ugomba gushaka uko ukemura ikibazo byihuse. Si  byo se

KHALIL: ni ko  kuri rwose pee. Hanyuma rero isaha yo gusohoka yageze. Uriteguye  se?

ELLA: gusohoka? Hehe ubwo?

KHALIL: ubanza wibagirwa vuba nawe. Si  wowe  wambwiye ko wifuza gutembera ukajyana n’abana se? Isaha rero yo   kugenda yageze genda witegure vuba ahubwo

Ella yari azi yuko wenda bamuha umurinzi bakajyana ntabwo yari azi yuko ari bujyane na  Khalil bwite

Ella yasohotse agana mu cyumba cye  ajya kwambara nuko abishoje arasohoka ajya kureba abana maze bicara mu modoka, ifite ibirahure byijimye

Abana inyuma naho Ella imbere, Khalil yambaye  lunettes zirinda izuba yinjiye mu modoka maze bagana mu mugi bari kumwe

Ashyize ubwenge ku gutwara imodoka, Khalil ntabwo yibujije kumva uburyo Ella yisize umubavu uhumura cyane ku buryo yumvaga yamwegera neza agakomeza kumwihumuriza. 

Ella yatangiye kuririmba indirimbo z’abana ari na ko akoma mu mashyi nuko abana na  bo aho  bicaye batangira kuririmba bafatanyije na we ari  na ko bakoma mu mashyi

Khalil yumvaga  yahita  aparika imodoka akabanza kumusoma mbere yo gukomeza urugendo kuko rwose  yumvaga ari kurushaho kumwishimira. Ntiyari yarigeze mu buzima bwe atekereza ko hari igihe nk’iki kizabaho  akumva anezerewe cyane

Yarebere muri  retroviseur yo mu modoka imbere maze abona abana be bizihiwe barimo baririmba yumva imbamutima ze zirazamutse pee

Yibajije mu mutima we ikindi gihe aheruka kwishima akumva ntabwo  acyibuka neza pee. 

Ubwo bageraga mu mugi abantu bagendaga bababona bakabapepera birumvikana ni umuryango uzwi, umuryango ukomeye mu gihugu

Ella gusa  yumvaga muri we adatuje cyane ko yumvaga umwanya arimo wakabaye urimo Aisha nyina w’abana ari we uri kumwe n’umugabo we n’abana babo

Byatumye atangira kugenda yubitse umutwe kubera isoni  n’ubwoba kandi rwose yumvaga  adashaka ko abantu bakomeza kumukanurira. Kubera kugenda yubitse umutwe byanatumye atabasha kureba neza umugi ngo awigeho amenye neza ibyawo kandi  ni cyo  cyari cyamuzanye mbere ya  byose

KHALIL: ese Ella wagerageje ukagenda ureba imbere

ELLA: erega abantu bose bari kundeba

KHALIL: none se bitwaye iki? Ngwino ahubwo twinjire hano

Yahise amufata ukuboko binjira mu iduka rimwe

Bagezemo yamubwiye ko ashaka kugurira abana be imyenda kuko badaheruka kubagurira nuko Ella ashakisha  udukanzzu tw’abana agira  Imana aratubona nuko yereka Khalil atizeye ko ashobora gushima ariko abona arashimye maze barishyura yumva na we arishimye kuba byibuze ibyo yahisemo uyu mugabo na we abashije kubyemera no kubishima

Ubwo barasohotse nuko Ella yumva noneho ari kugenda yisanzura cyane ndetse yishimiye uyu muryango yajemo kuko ntabwo yari yiteze ko gahunda ze zizagenda uko zagenze

*_Ese amaherezo azaba ayahe? Agace ka 12 ntuzagacikwe_*